Robert Medard, ki se yon Enspektè Polis, Tonbe anba bal Bandi nan kafou Marasa.
Yon gwoup bandi ki t’ap tante fè yon kidnaping sou kèk moun nan Kafou Marasa, krible Enspektè Divizyonè a, Robert Medard, avèk anpil katouch andedan machin li; daprè enfòmasyon, polisye a mouri menm kote a. Robert Medard se te responsab sikilasyon nan Kwadèboukè.
Nap raple w enstitisyon polis la fèk sot fete 27 lane egzistans li nan jou ki pase yo. Pandan jou seremoni yo DJ polis la, Frantz Elbe te deklare, “Nan yon ti tan tou kout lapolis pral genyen plis mwayen, plis fòs pou l goumen kont bandi yo, pou lapolis la byen pwoteje popilasyon an.” Yon lòt kote li voye mesaj sa bay kèk sitwayen, “N’ap kontinye batay chak jou kont tout kalite bandi, bandi ak sapat tankou bandi ak kòl.”
Antretan, sa fè apeprè 45 polisye ki jwenn lanmò yo depi mwa Jen 2021 an selon rapò ki soti nan RNDDH (Rezo Nasyonal pou Defans Dwa Moun).
